Keyps- og bíleggingartreytir - Leið 56

Bílegging 

Tú kanst bíleggja fram til í seinasta lagi 1/2 tíma fyri fráferð. 

Børn undir 7 ár ferðast ókeypis, men pláss má bíleggjast til tey. 

Tú rindar við gjaldskorti, tá tú bíleggur. Ómaksgjald kann koma afturat prísinum, alt eftir, hvat gjaldskort verður nýtt.

Øll, sum bíleggja sær ferðaseðil frammanundan, hava framíhjárætt at sleppa umborð á skipið, um tey møta til ásettu tíð.

Møtitíð - Ferðandi til gongu

Møtast skal í seinasta lagi 10 min. fyri fráferð. Ferðandi, ið koma seinni enn hetta, hava ikki framíhjárætt at sleppa við, og ferðaseðilin verður ikki endurgoldin. 

Møtitíð - Akfar

Akfarið skal vera í bíðirøð í seinasta lagi 15 min. fyri fráferð. Bíleggjast má fyri øll, sum eru afturat førarinum í bilinum. Men legg til merkis at:

• Børn undir 7 ár, sum ikki rinda ferðaseðil, kunnu vera í bilinum
• Fylgjari við rørðslutarnaðum, ið ikki rindar ferðaseðil, kann vera í bilinum

GG! 

Starvsfólk hjá SSL hava fullan rætt at avvísa akfari, sum ikki er í bíðirøðini til ásettu tíð. Peningur fyri bíleggingina verður tá ikki endurgoldin.

Bílegging kann bert nýtast til akfar, ið hevur bílagt, t.v.s. at tað er ikki loyvt at lata ferðaseðilin víðari til annað akfar.

Bílegging við SSL brúkara:  

Vit mæla øllum okkara kundum til at stovna sær ein brúkara og at bíleggja umvegis brúkaran. 

Sí okkara brúkaravegleiðingar her: 

Fyri at bíleggja víð tínum SSL brúkara, mást tú minnast til at rita inn, áðrenn tú bíleggur. Eisini er neyðugt at skráseta títt p-tal á tínum brúkara, fyri at tryggja tær búsitandi-prís. Tú hevur eisini møguleikan at keypa tær árskort til akfar og persón, ið gevur avsláttur, og gevur størri avsláttur, jú oftari tú ferðast.

Eisini hevur tú møguleikan at skráseta títt gjaldskort á tínum SSL-brúkara, ið ger tað lættari at bíleggja ferðaseðil.

Tú sært eitt yvirlit yvir bílagdir túrar inni á tínum SSL brúkara. 

Tað er neyðugt at bíleggja ferðaseðil, hóast tú hevur SSL brúkara.  

Uttan SSL brúkara:  

Tú rindar við gjaldskorti, tá tú bíleggur uttan SSL brúkara. Ómaksgjald kann leggjast afturat prísinum, alt eftir hvat gjaldskort verður nýtt.  

Kvittan fyri bílegging verður send við telduposti. Hevur tú ikki móttikið kvittan, kanna tá spam-teldupostin og at telduposturin er rættur. 

SSL kort 

Tað ber ikki til at bíleggja við SSL-kortum, men tað ber til at stilla seg í bíðirøð fyri bilar, ið ikki hava bílagt pláss, og síðani keypa ferðaseðil umborð við SSL-korti. Er tú til gongu kanst tú gjalda við SSL korti umborð. 

Árskort

Árskortið er persónligt og kann bert nýtast av tí persóni, sum eigur tann SSL brúkaran, ið kortið er knýtt at. Tað er krav, at brúkarin er innritaður við bílegging fyri at nýta árskortið. Tað er ikki loyvt at lata árskortið víðari til onnur.

Keyp við váttaðum bústaði (Búsitandi pláss/prísur)

Um tú hevur váttað tín bústað við tínum P-tali fyri at fáa atgongd til prísir fyri búsitandi, er tað bert loyvt at keypa ferðaseðlar til tín sjálvs og títt egna húsarhald gjøgnum henda møguleika. Tað er ikki loyvt at keypa ferðaseðlar til onnur enn tey, ið hoyra til títt húsarhald og búgva á sama bústaði. Misnýtsla av hesum møguleika kann føra til, at rætturin at keypa til búsitandi prís ella fáa búsitandi pláss verður tikin frá tær.

Avlýsing og broyting av ferðaseðli

Tú kanst avlýsa tína ferð ella gera broytingar fram til 2 tímar fyri fráferð. Niðast á bíleggingarkvittanini er ein leinkja at strika bíleggingina við. Um tú hevur bílagt við SSL brúkara, kanst tú bæði strika bílegging og gera broytingar inni á SSL brúkaranum.

Um tú strikar bíleggingina í seinasta lagi 2 tímar fyri fráferð, fært tú alla upphæddina endurgoldna. Eftir hetta ber ikki til at strika bílegging, og tú fært ikki peningin endurgoldnan.

Avlýstur túrur

Um SSL avlýsir ein túr verður bíleggingin strikað, og tú fært peningin afturgoldnan fyri ferðaseðilin. Tú mást tá sjálv/ur bíleggja nýggja ferð.

Allar avlýsingar verða lýstar á ssl.fo. Tað er kundans ábyrgd at kanna heimasíðuna fyri kunning um avlýsingar.

Vit bjóða eisini eina sms-tænastu, sum tú kanst tekna teg til, har avlýsingar og seinkingar verða lýstar. Tú finnur kunning um hesa tænastu undir "Um SSL -> Samband” á okkara heimasíðu. Tað kunnu tó koma trupulleikar við útlendskum telefonnumrum, og tí mæla vit til altíð at brúka heimasíðuna sum høvuðkeldu fyri kunning.

SSL endurrindar ikki pening fyri útreiðslur ella inntøkumiss, ið stavast frá seinkingum ella avlýsingum av túrum hjá SSL.

Annað

Tað er egin ábyrgd at tryggja, at tú hevur bílagt til røttu fráferð.  

Tað er egin ábyrgd at upplýsa røttu stødd á akfarinum tá tú bíleggur pláss, fyri at tryggja rættan ferðaseðil. Hevur tú upplýst skeiva stødd á akfarinum verður bíleggingin avvíst, uttan at kostnaðurin verður endurrindaður. 

Tað er egin ábyrgd at tryggja, at røtt nummarpláta er skrásett í bíleggingini. Er nummarplátan skeivt skrásett verður tú víst/ur til bíðirøð 2, uttan at kostnaðurin verður endurrindaður. 

Restpeningur, ið stendur á tínum SSL brúkara, kann bert afturgjaldast til føroyskar bankakontoir.

Frá 1. Januar 2025 verða treytirnar broyttar, soleiðis at eitt ómaksgjald á 200 krónur verður kravt fyri at fáa peningin afturgoldnan á tína bankakonto (peningur verður einans afturgoldin á føroyskar bankakonti).

Um tað standa minni enn 200 krónur á tínum SSL brúkara, ber ikki til at fáa peningin afturgoldnan.

SSL brúkarar, ið ikki hava verið í brúk í 3 ár, verða strikaðir og peningur, ið stendur á brúkarunum, fellur burtur.

Gevið gætur

Um sjúkra-, brand- ella annað akfar í bráfeingis ørindum skal við, verður tað seinasti bilur, sum er komin umborð, sum má lata pláss til bráfeingisakfar.

Frávik

Íbúgvar við borgarakorti hava framíhjárætt til 5 bilbásar og 30 sitipláss frá Klaksvík og úr Syðradali, hvønn túr.