Erla Kongsdóttir verður nú riggað til

Nýggja ferðafólkaskipið hjá Strandfaraskip Landsins, Erla Kongsdóttir, kom á Tvøroyri seinasta sunnukvøld, eftir at manningin hevði siglt úr Gursken í Noreg, har skipið er bygt.

Tað var 23. februar 2019, at GS Marine Produktsjón og Strandferðslan skrivaðu undir sáttmála, um at byggja nýggju skipið, og fór arbeiðið í gongd beinanvegin.

Manningin á Erlu Kongsdóttir hevur seinastu vikurnar verið í Noreg, har teir hava tikið neyðugu skeiðini at føra skipið og gjørt royndartúrar við Florø Skytsbåd, ið hevur líknandi skip í flotanum. Eisini var manningin við til at flota Erlu Kongsdóttir og gera ymiskar royndartúrar við henni, áðrenn kósin varð sett móti Føroyum seinasta leygardag. Strandferðslan arbeiðir nú við at klárgera skipið, og at fáa føroysk myndugleikakrøv upp á pláss, eitt nú ferðafólka- og trygdarloyvir.

Erla Kongsdóttir verður í høvuðsheitum sett í sigling sum avloysaraskip í miðøkinum, eitt nú á oyggjaleiðum millum Nólsoy – Tórshavn, Gamlarætt – Skopun, Hest og Koltur, umframt Syðradal – Klaksvík. Í summarhálvuni fer eisini at bera til at sigla til aðrar oyggjar, eitt nú Fugloy, Svínoy og Skúvoy.  Ein fortreyt fyri hesum er, at atløguviðurskiftini verða tillagað í mun til hæddina á rampuni á skipinum. Sum nú er, ber til at leggja at við Gomlurætt, í Skopun, á Syðradali og í Klaksvík. Eisini ber til at nýta rampuna við farstøðina í Tórshavn, tá ið hendan er tøk.

Hetta er ikki fyrstu fer, at tvíkilja fer at røkja oyggjaleiðir í Føroyum. Á sumri 1979 leigaði Strandferðslan eitt skifti tvíkiljuna Hornøy úr Noreg at røkja Suðuroyar- og Klaksvíkleiðina. Í 2018 var Issehoved leigað úr Danmark at røkja siglingina til Nólsoyar og út í Hest í 2 mánaðir.

Pláss er fyri 96 ferðafólkum umborð á Erlu Kongsdóttir, og kunnu 3 persónbilar vera á fordekkinum. Ferðafólk skulu sita niðri undir sigling, og er fullkomið bann fyri royking umborð.