Landsverk bjóðar øllum áhugaðum til framløgu og kjak um burðardygga ferðslu í Miðnámsskúlanum í Suðuroy hin 9. september 2024 millum klokkan 19.30 og 21.00. Viðgjørt verður, hvussu vit í komandi tíðum kunnu skipa samferðslu og ferðafólkaferðslu burðardyggari.
Tað er eingin loyna, at samferðslukervið í Føroyum í stóran mun er bygt til bilin. Hóast vegir okkara eru einbreytaðir og tvíbreytaðir, so er sjáldan sett pláss av til ábæru ferðsluna. Ábær ferðsla fevnir um fólk til gongu, fólk við rørslu- ella øðrum tarni og fólk á súkklu ella á prutli.
Landsverk hevur lagt til rættis tvey temabløð, sum snúgva seg um "Ábæra ferðslu" og "Ferðafólkaferðslu". Samanumtikið snúgva bæði temabløðini seg um, hvussu vit í Føroyum kunnu skipa okkara flutningsmøguleikar burðardyggari við atliti til ábæra ferðslu, men eisini, hvussu vit kunnu brúka vaksandi ferðafólkatalið, til at skipa samferðsluna innanlands burðardyggari.
Les meira um tiltakið og tilmelding á Landsverk.fo